Istanbuldagi dahshatli jinoyat: qotillar umrbodga qamaldi
Ular marhumalarning o‘limidan foydalanib, turar joyda o‘g‘rilik qilganlikda ham aybdor deb topildi.
Istanbulda D. Hakimova va S. Ergashaliyevani o‘ldirib, jasadlarini bo‘laklarga ajratgan ikki O‘zbekiston fuqarosiga sud hukmi o‘qildi.
Anadolu 17-og‘ir jinoyatlar sudi D. Turdimurotov va G‘. Kamolxo‘jayevning har biriga ikki martadan og‘irlashtirilgan umrbod qamoq jazosi tayinladi. Shuningdek, ular marhumalarning o‘limidan foydalanib, turar joyda o‘g‘rilik qilganlikda aybdor deb topilib, bu jinoyat uchun ham ikki martadan 7-yil qamoq jazosiga hukm qilindi.
Tergov ma’lumotlariga ko‘ra, 2026-yil 23-yanvar kuni S. Ergashaliyeva Istanbulning Umraniye tumanidagi uyda pichoq bilan o‘ldirilgan. Keyinchalik D. Hakimova ham shu uyda o‘ldirilgan.
Xavfsizlik kameralaridagi yozuvlarda sudlanuvchilarning uydan bir necha bor qora chiqindi paketlari va oq jamadon bilan chiqqani qayd etilgan. Tergov davomida jasad bo‘laklari Istanbulning turli tumanlaridagi chiqindi konteynerlariga tashlangani aniqlangan.
Sudda G‘. Kamolxo‘jayev S. Ergashaliyevani yolg‘iz o‘zi o‘ldirganini, D. Hakimovani esa o‘ldirmaganini aytdi. D. Turdimurotov esa faqat D. Hakimovani «nomus masalasi» sababli o‘ldirganini tan olib, qilgan ishidan pushaymon ekanini bildirdi.
Prokuror har ikki sudlanuvchiga ikki martadan og‘irlashtirilgan umrbod qamoq hamda o‘g‘rilik jinoyati uchun ikki martadan 7-yil qamoq jazosi tayinlashni so‘ragan.
Sud hay’ati prokurorning talabini qanoatlantirib, har ikki sudlanuvchiga ikki martadan og‘irlashtirilgan umrbod qamoq va ikki martadan 7-yil qamoq jazosi tayinladi.
