Filippindagi parom yong‘ini: qurbonlar soni 76 nafarga yetdi
Paromdan yana 41 kishining jasadi topildi, 13 kishi esa bedarak yo‘qolgan.
Filippin qirg‘oq xavfsizligi xizmati M/V June Aster paromidan yana 41 kishining jasadi topilganini ma’lum qildi. Hodisa oqibatida halok bo‘lganlar soni 76 nafarga yetgan, 13 kishi esa hanuz bedarak yo‘qolgan.
M/V June Aster paromi chorshanba kuni kechqurun Maniladan Koron shahri tomon yo‘l olgan. Kema Palavan provinsiyasidagi Koron portiga yetib kelishiga 2,2 kilometr qolganida uning quyi palubalarida yong‘in chiqqan. Parom bortida jami 132 nafar yo‘lovchi va ekipaj a’zosi bo‘lgan. Yong‘in boshlanganidan so‘ng qutqaruvchilar suvdan 43 nafar tirik qolgan kishini olib chiqqan.
Tergov ma’lumotlariga ko‘ra, omon qolganlar yong‘in boshlanishidan oldin ketma-ket portlashlar ovozini eshitganini bildirgan. Shundan so‘ng alanga yo‘lovchilar joylashgan hududlarga tez tarqalgan. Rasmiylar bunga shamol ham sabab bo‘lgan bo‘lishi mumkinligini aytmoqda.
Ayrim yo‘lovchilar yong‘inni ko‘rgach, suvga sakragan va qutqaruv jiletlarini olishga ulgurmagan.
Hozirda sud-tibbiy ekspertlar va politsiya halok bo‘lganlarning shaxsini aniqlash uchun ularning shaxsiy buyumlari hamda DNK tahlillaridan foydalanmoqda.
Shuningdek, kemadagi xavfsizlik choralariga rioya qilingani va falokatning dastlabki daqiqalarida kapitan qanday harakat qilgani yuzasidan rasmiy tekshiruv olib borilmoqda.
Parom operatori "Atienza Interisland Ferries" kompaniyasi tergovda to‘liq hamkorlik qilishini hamda jabrlanganlar oilalariga turar joy, transport va tibbiy yordam ko‘rsatishini bildirgan.
Avvalroq yongan paromdan 30 kishining jasadi topilib hodisada halok bo‘lganlar soni jami 35 nafarni tashkil qilgandi.
