Filippinda paromdagi yong‘inda 35 kishi halok bo‘ldi

Filippinda yongan paromdan 30 kishining jasadi topildi. Shu bilan hodisada halok bo‘lganlar soni 35 nafarga yetdi. Qidiruv-qutqaruv ishlari davom etmoqda.

 

Qutqaruvchilar kuchli tutun va yuqori harorat sabab bir necha kun kira olmagan kemaga yong‘in o‘chirilgach, ilk bor kirgan. Hodisa joyidan 30 kishining jasadi olib chiqilgan.

 

Rasmiylarga ko‘ra, paromda yong‘in chiqqan vaqtda 130 nafardan ortiq odam bo‘lgan. Juma kuni ertalab 43 kishi qutqarilgani, 84 kishi esa bedarak yo‘qolgani ma’lum qilingan.

 

Sohil qo‘riqlash xizmati tarqatgan suratlarda parom ichidagi yotoq joylari butunlay yonib, metall va kulga aylangani ko‘rinadi. Ayrim suratlarda kuygan qoldiqlar orasidan inson skeletiga o‘xshash qoldiqlar ham aks etgan.

 

Omon qolgan yo‘lovchilardan biri yong‘in dastlab oz miqdordagi tutundan boshlanganini, biroq bir necha soniya ichida kuchli alangaga aylanganini aytdi. Uning so‘zlariga ko‘ra, u va boshqa yo‘lovchilar qutqarilguniga qadar qariyb ikki soat dengizda suzib turgan.

 

Yong‘in sababi hozircha aniqlanmagan. Filippin Dengiz sanoati boshqarmasi tirik qolganlarning ko‘rsatmalariga tayanib, kemada ketma-ket ikkita portlash ovozi eshitilgani va shundan keyin yong‘in boshlanganini bildirdi.

 

330 kishiga mo‘ljallangan parom 20 soatdan ortiq davom etgan safar yakuniga yaqinlashib, shimoliy Palavan provinsiyasidagi mashhur sayyohlik maskani Koron tomon ketayotgan bo‘lgan. Kemada beshta mototsikl, elektromobil, forklift, pikap va boshqa yuklar ham bo‘lgan.

 

Hodisa Filippinda so‘nggi davrdagi navbatdagi yirik dengiz fojiasi bo‘ldi. Yanvar oyida 300 nafardan ortiq odam bo‘lgan yo‘lovchi kemasi mamlakat janubidagi Sulu provinsiyasi tomon yo‘lda cho‘kib ketgan va 60 dan ortiq kishi halok bo‘lgan.