“Foizsiz kredit” tuzog‘i: 400 dan ortiq kishi aldandi
Toshkent viloyatida fuqarolarga foizsiz kredit olib berishni va’da qilib, ularning pulini o'zlashtirgan jinoiy guruh faoliyatiga chek qo‘yildi.
Toshkent viloyati IIBB Axborot texnologiyalari sohasidagi jinoyatlarga qarshi kurashish boshqarmasi tezkor xodimlari tomonidan o‘tkazilgan tadbirlar davomida jinoiy guruh fosh etildi.
Aniqlanishicha, guruh a’zolari internet tarmoqlarida “foizsiz kredit olib beramiz” mazmunidagi e’lonlarni joylashtirib, taklifga qiziqqan fuqarolarni oldindan ijaraga olingan hashamatli ofislarga chaqirgan.
Ular fuqarolarga o‘z nomlariga kredit rasmiylashtirib berishni taklif qilgan. Masalan, 100 million so‘mlik kreditning 50 million so‘mi fuqaroga berilishi, qolgan 50 million so‘mi esa kompaniyada qolishi, kreditning oylik to‘lovlarini esa guruh a’zolari o‘zlari to‘lab borishini va’da qilgan.
Bu va’dalarga ishongan fuqarolar o‘z telefonlari orqali kredit rasmiylashtirgan. Natijada 400 nafardan ortiq fuqaroning nomiga kreditlar olingan va ajratilgan mablag‘larning teng yarmi firibgarlar tomonidan o‘zlashtirilgan. O‘zlashtirilgan mablag‘larning umumiy miqdori qariyb 17 milliard so‘mni tashkil etgan. Oradan vaqt o‘tib, fuqarolarga banklar tomonidan kredit qarzdorligini undirish bo‘yicha talabnomalar yuborila boshlangan.
Mazkur holat yuzasidan Jinoyat kodeksining 168-moddasi (Firibgarlik) bilan jinoyat ishi qo‘zg‘atilgan.
Tergovga qadar tekshiruv va tezkor tadbirlar davomida guruhning olti nafar a’zosi gumonlanuvchi tariqasida ushlanib, qamoqqa olingan. Hozirda jinoyat ishi yuzasidan tergov harakatlari davom etmoqda.
IIBB fuqarolarni internetdagi “foizsiz kredit”, “juda kam foizli kredit” yoki “hujjatsiz kredit” kabi shubhali takliflarga ishonmaslikka chaqirdi.
Shuningdek, kredit boshqa shaxs tomonidan to‘lab borilishi haqidagi va’dalarga aldanmaslik kerakligi ta’kidlandi. Chunki kredit fuqaroning nomiga rasmiylashtirilgan bo‘lsa, bank oldidagi majburiyat ham uning zimmasida qoladi.
