Rossiya poyezdga zarba berdi: Yevropaning yuqori martabali amaldorlari hudud yaqinida bo‘lgan
Boris Jonson, Germaniya kansleri maslahatchisi Gyunter Zautter va Shvetsiyaning sobiq bosh vaziri Karl Bildt Ukrainadan qaytayotgan bo‘lgan.
13-sentyabr kuni Rossiya qo‘shinlari Polsha chegarasidan bir necha kilometr uzoqlikda harakatlanayotgan yo‘lovchi poyezdi lokomotiviga dron bilan zarba berdi. Hujum oqibatida hech kim jabrlanmagan.
Ukraina temir yo‘llari ma’lumotiga ko‘ra, poyezd brigadasi hujum xavfi haqida oldindan ogohlantirilgan. Poyezd to‘xtatilgan va yo‘lovchilar evakuatsiyaga tayyorlangan.
Der Spiegel nashrining yozishicha, hujumga uchragan poyezd yaqinida Ukrainadan Polshaga yo‘l olayotgan maxsus temir yo‘l tarkibi ham bo‘lgan. Unda Buyuk Britaniyaning sobiq bosh vaziri Boris Jonson hamda Germaniya kansleri Fridrix Merzning yaqin maslahatchilaridan biri Gyunter Zautter bo‘lgan.
Xavf bekor qilingach, poyezdlar harakatini davom ettirgan.
Ukrainadan temir yo‘l orqali qaytayotgan Shvetsiyaning sobiq bosh vaziri Karl Bildt ham Polsha chegarasi yaqinidagi hujum aks etgan videoni X ijtimoiy tarmog‘iga joylashtirdi.
“Bu bizning poyezdimiz emas edi, u bizdan bir necha daqiqa keyin chegaradagi o‘tish punktidan o‘tgan poyezd edi”, — deb yozdi Bildt.
U Ukraina temir yo‘llarida yo‘lga qo‘yilgan xavfsizlik tizimi qurbonlarning oldini olishga yordam berganini ta’kidladi.
11–12-sentyabr kunlari Kiyevda YES (Yalta European Strategy) konferensiyasi bo‘lib o‘tdi. Unda Yevropaning qator siyosatchilari ham qatnashgan.
Dron poyezdga va Ukraina-Polsha chegarasi yaqinidagi yonilg‘i quyish shoxobchasiga hujum qilganidan so‘ng Ukraina tashqi ishlar vaziri Andrey Sibiga Yevropa davlatlarini Rossiyaga nisbatan sanksiya bosimini kuchaytirishga chaqirdi.
“Rossiyalik varvarlar allaqachon ostonangizda, aziz hamkorlar”, — dedi Sibiga.
