5,5 mlrd so‘m asossiz undirilgan: hududiy elektr tarmoqlari korxonalariga ish qo‘zg‘atildi
Respublika bo‘yicha 965 ta holatda tadbirkorlardan elektr tarmog‘iga qayta ulanish uchun to‘lov olingani aniqlangan.
Raqobat qo‘mitasi hududiy elektr tarmoqlari korxonalari tomonidan tadbirkorlik subyektlaridan elektr tarmog‘iga qayta ulanish uchun asossiz to‘lov undirilgani yuzasidan ish qo‘zg‘atdi.
Ma’lum qilinishicha, amaldagi tartibga ko‘ra, elektr energiyasidan qarzdorlik bartaraf etilgach, korxonalarni elektr tarmog‘iga qayta ulash uchun jarima va qo‘shimcha to‘lov undirish bekor qilingan. Tegishli o‘zgartirishlar elektr energiyasidan foydalanish qoidalariga ham kiritilgan.
Biroq Raqobat qo‘mitasiga Biznes-ombudsman tomonidan taqdim etilgan ma’lumotlar tahlili natijasida 2025-yil 23-avgustdan 2026-yil fevraligacha tadbirkorlardan qayta ulanish uchun jami 965 ta holatda 5,5 mlrd so‘m undirilgani aniqlangan.
Shu munosabat bilan “Hududiy elektr tarmoqlari” AJ va uning tizimidagi korxonalarga nisbatan ish qo‘zg‘atilgan.
Hozirda holatlar manfaatdor davlat organlari ishtirokida o‘rganilmoqda. Ishni ko‘rib chiqish yakunlari bo‘yicha qo‘shimcha ma’lumot berilishi bildirilgan.
