“Atirgul” ko‘rik-tanlovi g‘oliblari taqdirlandi
Marosimda uyushmaga yangi qabul qilingan 25 nafar ayol jurnalistga ham a’zolik guvohnomalari topshirildi.
O‘zbekiston Jurnalistlar uyushmasi tashabbusi va Oila va xotin-qizlar qo‘mitasi hamkorligida xotin-qiz jurnalistlar o‘rtasida o‘tkazilgan “Atirgul” ko‘rik-tanlovining g‘oliblarini taqdirlash marosimi bo‘lib o‘tdi.
Tanlov jurnalistika sohasida faoliyat yuritayotgan ayollarning kasbiy mahorati, ijodiy izlanishlari va jamiyat hayotidagi faolligini qo‘llab-quvvatlash maqsadida tashkil etildi.
Ko‘rik-tanlovning 12 ta nominatsiyasi bo‘yicha g‘oliblar taqdirlandi. Ishtirokchilarning ijodiy ishlari mazmuni, dolzarbligi, kasbiy mahorati va yangicha yondashuvi asosida hakamlar hay’ati tomonidan baholandi.
Tadbir davomida O‘zbekiston Jurnalistlar uyushmasiga yangi qabul qilingan 25 nafar ayol jurnalistga a’zolik guvohnomalari ham topshirildi.
Tashkilotchilarga ko‘ra, “Atirgul” tanlovi ayol jurnalistlarning ijodiy salohiyatini namoyon etish, ilg‘or tajribalarini ommalashtirish hamda kasbiy hamkorlik va tajriba almashish uchun imkoniyat yaratishga xizmat qiladi.
Bugungi kunda jurnalistika tezkorlik bilan bir qatorda chuqur tahlil, zamonaviy texnologiyalardan foydalanish va yangi ijodiy yondashuvlarni talab qilmoqda. Shu nuqtayi nazardan, tanlov xotin-qiz jurnalistlarning ushbu yo‘nalishlardagi ishlarini rag‘batlantirishga qaratilgan.
Taqdirlash marosimida tanlov g‘oliblari va yangi uyushma a’zolariga muvaffaqiyat tilaklari bildirildi.
