G‘azoda urushdan zarar ko‘rgan bino qulab tushdi: 21 kishi halok bo‘ldi
Binoda boshpanaga muhtoj, ko‘chirilgan oilalar yashayotgan bo‘lgan.
G‘azo sektorida urush vaqtida zarar ko‘rgan olti qavatli bino qulab tushishi oqibatida kamida 21 kishi, jumladan sakkiz nafar bola halok bo‘ldi. Yana 45 nafar jabrlanuvchi shifoxonalarga olib ketilgan.
Hodisa chorshanba kuni erta tongda G‘azo shahrining Tal al-Havo hududida yuz bergan. Guvohlarning BBC'ga aytishicha, bino bir yildan ortiq vaqt avval Isroil zarbasidan keyin bir tomonga xavfli tarzda qiyshayib qolgan. Shunga qaramay, boshpanaga muhtoj ko‘chirilgan oilalar binoda yashashda davom etgan.
Qutqaruv ishlariga BMT va Misr guruhlari ham qo‘shilgan. Biroq zarur texnika yetishmagani sababli dastlab Hamas nazoratidagi Fuqaro muhofazasi xodimlari vayronalar ostidan odamlarni qo‘llari bilan qidirishga majbur bo‘lgan.
Guvohlarning so‘zlariga ko‘ra, bino qulashidan oldin undan muntazam ravishda tosh bo‘laklari tushib turgan va uning bir tomonga qiyshaygani ko‘rinib turgan. Vayronalar ostidan qutqaruv ishlari chorshanba kuni tushdan keyin yakunlangan.
Sun’iy yo‘ldosh tasvirlari bino joylashgan hudud urushning dastlabki haftalarida hujumlarga uchraganini ko‘rsatadi. Binoning o‘zidagi jiddiy zarar esa ilk bor 2024-yilda qayd etilgan.
