Uy-joy va meros: yetim bolalar huquqi qanday himoya qilinadi?
Yangi qonun bilan vasiylik va homiylik to‘g‘risidagi qonunchilikka muhim o‘zgartishlar kiritilmoqda.
Amaldagi tartibga ko‘ra, vasiylar va homiylar o‘z qaramog‘ida tarbiyalanayotgan yetim hamda ota-ona qaramog‘idan mahrum bo‘lgan bolalarning huquq va manfaatlarini himoya qiladi.
Shuningdek, 18 yoshdan oshgan shaxs muomalaga layoqatsiz deb topilgan, muomala layoqati cheklangan yoki jismoniy salomatligi sababli o‘z huquqlarini mustaqil himoya qila olmaydigan holatlarda ham vasiylik yoki homiylik belgilanadi.
Avval vasiy va homiylarga o‘z qaramog‘idagi shaxsning mol-mulki, merosi yoki hadyalaridan voz kechish huquqi berilgan edi. Yangi qonunchilikka ko‘ra, endi ular o‘z qaramog‘idagi shaxsning hadyasi, mol-mulki yoki merosidan voz kecha olmaydi.
Bu o‘zgartishlar himoyaga muhtoj bolalarga meros bo‘lib qolgan yoki qoladigan uy-joyda yashash va undan foydalanish huquqlarini saqlab qolish, shuningdek, ularga tegishli mol-mulkning begonalashtirilishining oldini olishga xizmat qiladi.
