Деновда 4 зўравон бир эркакни уриб ўлдирди
Жанжал пул олди-берди масаласидаги зиддият туфайли юз берган.
Ижтимоий тармоқларда Сурхондарё вилоятининг Денов шаҳрида фуқаро уриб ўлдирилгани ҳақида тарқалган хабарлар юзасидан вилоят ИИБ расмий ахборот берди.
Маълум қилинишича, 27 апрель куни соат 17:50 атрофида “Боғишамол” маҳалласи ҳудудида жойлашган автотранспорт ювиш шохобчаси олдида 1970 йилда туғилган А.У. ва унинг ўғли, 1994 йилда туғилган А.А.га бир гуруҳ шахслар ҳужум қилган.
Дастлабки маълумотларга кўра, воқеа пул олди-берди масаласида аввалдан мавжуд бўлган зиддият ортидан келиб чиққан. Жабрланувчиларни уларнинг жияни — 1989 йилда туғилган Қ.Ш. ҳамда унинг 3 нафар шериги урган ва тан жароҳати етказган. Шундан сўнг улар жабрланувчилардан бирини “Gentra” автомашинасига ўтқазиб, воқеа жойидан олиб кетишган.
Жабрланувчи А.А. шу куни туман тиббиёт муассасасига ётқизилган. У оғир, ҳаёт учун хавфли тан жароҳатлари олган бўлиб, шифокорлар кўрсатган муолажаларга қарамасдан 28 апрель куни вафот этган.
Ҳолат юзасидан Денов тумани ИИБ томонидан Ўзбекистон Республикаси Жиноят кодексининг 104-моддаси 2-қисми “к, е” бандлари билан жиноят иши қўзғатилиб, тўрт нафар гумонланувчи процессуал тартибда қамоққа олинган.
Кейинроқ жиноят иши мазкур кодекснинг 104-моддаси 3-қисми “д” бандига қайта малакаланган.
Тергов ҳаракатлари давом этмоқда.
