Isroilliklar Al-Aqso masjidiga bostirib kirdi: bir kunda ularning soni 1317 nafarga yetdi
Isroilliklar diniy marosimlar o‘tkazgan, ibodat qilgan, qo‘shiq kuylagan va raqsga tushgan.
1,3 mingdan ortiq isroillik bosib olingan Sharqiy Quddusdagi Al-Aqso masjidiga Isroil politsiyasi himoyasi ostida bostirib kirdi. Bu haqda Quddusdagi Islom vaqflari boshqarmasiga tayanib, Anadolu agentligi xabar berdi.
Ma’lum qilinishicha, 30-sentyabr kuni ertalab 1 317 nafar isroillik Isroil politsiyasi hamrohligida muqaddas qadamjo hududiga bostirib kirgan.
Quddusdagi Islom vaqflari boshqarmasining ismini oshkor etishni istamagan vakili ertalabdan yuzlab isroilliklar Isroil politsiyasi qo‘riqlovi ostida Al-Aqsoga bostirib kirishni davom ettirayotganini bildirgan.
Uning so‘zlariga ko‘ra, bostirib kirishlar davomida Al-Aqso masjidining tarixiy status-kvosi buzilgan. Isroilliklar diniy marosimlar o‘tkazgan, ibodat qilgan, qo‘shiq kuylagan va raqsga tushgan.
Quddusdagi Islom vaqflari boshqarmasi ma’lumotlariga ko‘ra, 27-sentyabrdan buyon minglab isroilliklar Sukkot bayramini nishonlash bahonasida Al-Aqso masjidiga bostirib kirmoqda.
Yahudiylarning bayramlar davri 12–13-sentyabr kunlari Yangi yil bayrami bilan boshlangan. Shundan so‘ng 21-sentyabrda Yom-Kippur, 26-sentyabrdan 2-oktyabrgacha Sukkot va 3-oktyabrda Simxat-Tora (Tavrotni yillik o‘qish siklining yakunlanish bayrami) nishonlanadi.
