Xarkovga aviabombalar tashlandi: halok bo‘lganlar soni ikki kishiga yetdi
Avvalroq bir kishi halok bo‘lgani va to‘qqiz kishi jarohatlangani xabar qilingandi.
Ukrainaning Xarkov shahriga 2-oktyabr kuni boshqariladigan aviabombalar bilan zarbalar berildi. Hujum oqibatida ikki kishi halok bo‘ldi, 17 kishi jarohatlandi. Jabrlanganlar orasida bola ham bor.
Xarkov meri Igor Terexovning ma’lum qilishicha, zarbalar shaharning Slobidskiy va Nemishlyanskiy tumanlaridagi xususiy uylar joylashgan hududlarga berilgan. Aviabombalardan biri turar joy binosiga kelib tushgan va uyni to‘liq vayron qilgan.
Dastlab hujum oqibatida bir kishi halok bo‘lgani va to‘qqiz kishi jarohatlangani xabar qilingan. Keyinchalik Xarkov viloyati harbiy ma’muriyati rahbari Oleg Sinegubov jabrlanganlar soni 17 nafarga yetganini ma’lum qilgan. Oradan ko‘p o‘tmay, vayronalar ostidan yana bir kishining jasadi topilgan.
Mahalliy rasmiylarga ko‘ra, hujum oqibatida xususiy uylar, ofis binolari, ta’lim muassasasi va avtomobillar ham zarar ko‘rgan. Qutqaruv va tez tibbiy yordam xizmatlari voqea joylarida ish olib bormoqda.
