Afg‘onistondan kelgan yuk mashinasi tekshirildi: 52,5 kg narkotik topildi
“Ayritom” chegara bojxona postiga kirib kelgan yuk mashina tirkamasining poliga yashirilgan o‘ramlardan 42,3 kilogramm gashish va 10,2 kilogramm opiy topilgan.
Surxondaryo viloyatida Afg‘onistondan O‘zbekistonga yirik miqdordagi giyohvandlik vositalarini olib kirishga urinish fosh etildi. Bu haqda Bojxona qo‘mitasi raisining matbuot kotibi xabar berdi.
1-oktyabr kuni soat 22:30 da Afg‘onistondan “Ayritom” chegara bojxona postiga kirib kelgan bo‘sh yuk avtomobili bojxona nazoratidan o‘tkazilgan. Tekshiruv vaqtida kinologiya xizmati itining transport vositasiga nisbatan belgi berishi bojxona xodimlarida shubha uyg‘otgan. Shundan so‘ng Termiz tumanida istiqomat qiluvchi, 1993-yilda tug‘ilgan fuqaro boshqaruvidagi yuk avtomobili chuqurlashtirilgan bojxona nazoratidan o‘tkazilgan.
Natijada avtomobil tirkamasining pol qismi ostiga yashirilgan 98 dona o‘ram aniqlangan. Ularning 79 tasidan 42 kilogramm 335 gramm gashish, 19 tasidan esa 10 kilogramm 260 gramm opiy topilgan. Shu tariqa o‘ramlari bilan birga olib qo‘yilgan giyohvandlik vositalarining umumiy og‘irligi 52 kilogramm 595 grammni tashkil etgan. Mutaxassislar hisob-kitobiga ko‘ra, mazkur miqdordagi giyohvandlik vositalari salkam 340 ming dozaga teng.
Mazkur holat bojxona xodimlari, Chegara qo‘shinlari harbiy xizmatchilari, Davlat xavfsizlik xizmati hamda ichki ishlar organlari vakillari hamkorligida aniqlangan. Hozirda holat yuzasidan tegishli protsessual tadbirlar olib borilmoqda.
Ma’lumot uchun, 2026-yilning o‘tgan davrida O‘zbekiston bojxona organlari huquqni muhofaza qiluvchi boshqa idoralar bilan hamkorlikda 1,9 tonnadan ziyod giyohvandlik vositalarining noqonuniy olib kirilishi va mamlakat hududidagi yashirin aylanmasiga chek qo‘ygan.
