Irkutskdagi o‘lat gumoni: O‘zbekistonning epidemiologik vaziyati qanday?
Sanepidqo‘mita epidemiologik vaziyat yuzasidan izoh berdi.
O‘zbekistonda o‘lat kasalligi bilan bog‘liq epidemiologik vaziyat barqaror. Bu haqda Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Otabekov maʼlum qildi.
Avvalroq Rossiyaning Irkutsk shahrida o‘lat kasalligiga gumon qilingan holat qayd etilgani haqida xabarlar tarqalgan edi.
Nurmat Otabekovning taʼkidlashicha, Rossiyaning “Rospotrebnadzor” xizmati rasmiy maʼlumotlariga ko‘ra, Irkutskda kuzatilgan holatning o‘lat kasalligi, xususan, uning o‘pka shakli bilan bog‘liqligi hozircha tasdiqlanmagan. Mazkur holat yuzasidan tegishli tekshiruvlar davom etmoqda.
Mutaxassisning qayd etishicha, o‘lat bakteriyalar sabab yuzaga keladigan o‘ta xavfli yuqumli kasallik hisoblanadi. Uning tabiiy o‘choqlari dunyoning ayrim hududlarida mavjud bo‘lib, kasallik asosan mayda sut emizuvchi hayvonlar orasida uchraydi. Odamga esa ko‘pincha kasallangan hayvonlar yoki ulardagi burgalarning chaqishi orqali yuqishi mumkin.
O‘zbekistonda o‘lat va boshqa o‘ta xavfli yuqumli kasalliklarning mamlakat hududiga kirib kelishi va tarqalishining oldini olish bo‘yicha zarur profilaktik choralar ko‘rilmoqda.
Xususan, davlat chegarasini kesib o‘tish joylarida — xalqaro aeroportlar, temir yo‘l stansiyalari va avtomobil yo‘llarida — 53 ta sanitariya nazorat punkti faoliyat yuritmoqda. Ular orqali mamlakatga kirib kelayotgan shaxslar tibbiy kuzatuvdan o‘tkaziladi.
Bundan tashqari, hududiy sanitariya-epidemiologiya xizmatlarining o‘ta xavfli yuqumli kasalliklarni aniqlashga ixtisoslashgan laboratoriyalari zarur diagnostik vositalar, ozuqa muhitlari, reagentlar va reaktivlar bilan taʼminlangan.
Sanepidqo‘m vakili mamlakatda o‘lat kasalligi bilan bog‘liq epidemiologik vaziyat barqaror ekanini va hozircha xavotirlanishga asos yo‘qligini bildirdi.
