Tailandda 30 dollarlik chiqish yig‘imi joriy etilishi mumkin: u turistlar va fuqarolardan olinadi
Yig‘im faqat mamlakatdan havo transportida chiqishda undiriladi, quruqlik va dengiz orqali chiqishda esa olinmaydi.
Tailand hukumati mamlakatdan samolyotda chiqib ketadigan shaxslardan yangi yig‘im undirishni taklif qilmoqda. Tashabbus bo‘yicha jamoatchilik muhokamasi 29-oktyabrgacha davom etadi.
Taklif etilayotgan tartibga ko‘ra, chiqish yig‘imi ming bat, ya’ni taxminan 30 dollarni tashkil qiladi. U xorijiy sayyohlar bilan birga Tailand fuqarolaridan ham undiriladi.
Yig‘imni aviakompaniyalar yoki ularning agentlari aviachipta uchun to‘lov vaqtida undirishi rejalashtirilgan. Qirollik oilasi a’zolari, patriarx, xorijiy davlatlar rahbarlari, hukumatning rasmiy mehmonlari hamda ikki yoshgacha bo‘lgan bolalarni yig‘imdan ozod qilish taklif etilmoqda.
Mamlakatdan quruqlik yoki dengiz orqali chiqib ketuvchilardan esa ushbu yig‘im olinmaydi.
Tailand Moliya vazirligi yangi yig‘im ichki turizmni rivojlantirish va mablag‘larning mamlakat iqtisodiyotida qolishiga yordam berishini hisoblamoqda. Biroq Tailand turistik agentliklari assotsiatsiyasi tashabbusni tanqid qilgan.
Jamoatchilik muhokamasi yakunlangach, taklif qonun sifatida qabul qilinsa, u rasman e’lon qilinganidan 180 kun o‘tib kuchga kiradi.
Shuningdek, Tailand rasmiylari xorijiy sayyohlar uchun 450 bat (taxminan 13,5 dollar) miqdorida oshirilgan yig‘im joriy etish masalasini ham ko‘rib chiqmoqda. Mazkur chorani 2027-yilda qabul qilish rejalashtirilgan.
