Navai ishi tugatildi: reper Qozog‘istonni tark etdi
Rossiyalik reper Navai Qozog‘istonga kirayotganida giyohvand moddalar kontrabandasida gumon qilinib hibsga olingan edi.
Qozog‘istonda giyohvand moddalar kontrabandasida gumon qilinib hibsga olingan rossiyalik reper Navaiga (Navai Bakirov) nisbatan qo‘zg‘atilgan jinoyat ishi tugatildi. Bu haqda Jambil viloyati politsiya boshqarmasi matbuot xizmati ma’lum qildi.
Politsiya ma’lumotiga ko‘ra, ish ijrochining birinchi marta jinoyat sodir etgani va jinoyat-protsessual qonunchilik talablariga muvofiq faol pushaymonlik bildirgani hisobga olinib, reabilitatsiya qilinmaydigan asoslar bilan tugatilgan. Tegishli qaror nazorat organi tomonidan tasdiqlangan.
Shundan so‘ng Navai Qozog‘istondan chiqarib yuborilgan.
Eslatib o'tamiz, reper 13-oktabr kuni Qozog‘istonga kirayotganida Qirg‘iziston bilan chegaradagi Korday nazorat-o‘tkazish punktida hibsga olingan. Politsiya uning ketayotgan avtomobilini tintuv qilish vaqtida giyohvand moddalar topilganini bildirgan. Shundan so‘ng unga nisbatan kontrabandaga urinish bo‘yicha jinoyat ishi qo‘zg‘atilgan.
Navai Qozog‘istonga konsert berish uchun yo‘l olgan edi. Uning 14-oktabr kuni Ostona shahrida o‘tkazilishi rejalashtirilgan chiqishi bekor qilingan.
