Kolumbiyada noqonuniy oltin koni quladi: 14 kishi halok bo‘ldi
Hodisa oqibatida yana yetti kishi jarohatlangan.
Kolumbiyaning Narino departamentidagi Santa-Barbara munitsipalitetida noqonuniy oltin konining qulashi oqibatida kamida 14 kishi halok bo‘ldi. Yana yetti nafar konchi jarohatlandi.
Mahalliy OAV xabarlariga ko‘ra, oltin qazib olish vaqtida yuz bergan tosh ko‘chishi konchilarni vayronalar ostida qoldirgan. Hodisadan so‘ng mahalliy aholi va qutqaruv guruhlari jabrlanganlarga yordam berish hamda konchilarni qutqarish uchun ish boshlagan.
Kolumbiyaning Tabiiy ofatlar xavfini boshqarish milliy bo‘limi (UNGRD) maʼlumotiga ko‘ra, halok bo‘lganlar va jarohatlanganlarni vayronalar ostidan olib chiqish ishlarida mahalliy aholi hamda qutqaruvchilar ishtirok etgan.
Narino gubernatori Luis Alfonso Eskobar halok bo‘lganlarning yaqinlariga hamdardlik bildirib, favqulodda vaziyatlarda insonlar hayotini himoya qilish va jabrlangan oilalarni qo‘llab-quvvatlash muhimligini taʼkidladi.
Maʼlumot uchun, Kolumbiyada avgust oyida ham shunga o‘xshash hodisa yuz berib, 13 kishining hayotiga zomin bo‘lgan edi.
