Har bir viloyatda nemis tilini o‘rgatadigan texnikumlar tashkil etilishi mumkin
Prezident xorijda yuqori daromadli ish topish uchun yoshlarni kasb bilan birga chet tillariga ham o‘qitish zarurligini ta’kidladi.
Yevropa Ittifoqi ilk bor Markaziy Osiyodan mutaxassislarni jalb etish masalasini migratsiya strategiyasiga kiritdi. Prezident Shavkat Mirziyoyev ushbu imkoniyatlardan foydalanishda elchilar, hokimlar va texnikumlarning faolligi yetarli emasligini qayd etdi.
Ma’lum qilinishicha, Buyuk Britaniyada 33 ming nafar ishchi kuchiga ehtiyoj mavjud. Biroq hozirga qadar ushbu mamlakatga asosan qishloq xo‘jaligidagi mavsumiy ishlarga fuqarolar yuborilmoqda. Tibbiyot, logistika va sanoat sohalaridagi ish beruvchilar bilan aniq kelishuvlar yo‘qligi, shuningdek, “Yoshlar mobilligi” dasturida ishtirok etish masalasi hal etilmagani ko‘rsatib o‘tildi.
Italiya bilan ham mehnat migratsiyasi imkoniyatlarini kengaytirish bo‘yicha kelishuv mavjud, biroq bu imkoniyatlardan hali foydalanilmayapti.
Prezident chet tillarini bilish xorijda yuqori daromadli ish topishning asosiy shartlaridan biri ekaniga e’tibor qaratdi. Mamlakatda ingliz tilini puxta o‘rganib, sertifikat olgan 200 mingga yaqin yosh bor. Shu bilan birga, ularning AQSH, Kanada, Avstraliya, Yangi Zelandiya, Shvetsiya va Daniyada ishlashi uchun imkoniyat yaratish borasidagi ishlar yetarli emasligi qayd etildi.
Germaniyadan joriy yilning o‘zida 45 ming mutaxassisga buyurtma kelib tushgan, ammo atigi 2 ming kishi ishga joylashgan. Buning asosiy sababi nemis tilini biladigan kadrlar yetishmasligi bilan izohlandi. Shu bois kasbiy ta’lim bilan birga til tayyorgarligini ham olib borish zarurligi ta’kidlandi.
Germaniyaning “Globogate” kompaniyasi bilan hamkorlikda respublikadagi 20 ta tibbiyot texnikumida yiliga 1,5 ming nafar hamshira tayyorlanmoqda. Qarshidagi Ilg‘or kasbiy mahorat texnikumida esa germaniyalik o‘qituvchilar yoshlarga nemis tili va kasb o‘rgatmoqda.
Prezident xorijlik ish beruvchilarning buyurtmalarini texnikumlardagi ta’lim bilan bog‘lash, yoshlarni ishga joylashish uchun zarur til va amaliy ko‘nikmalarga maqsadli tayyorlash muhimligini ta’kidladi.
Andijonda tadbirkor bo‘sh turgan texnikumni ta’mirlab, Germaniyadan o‘qituvchilar jalb etgan holda yiliga 1,5 ming mutaxassis tayyorlamoqda. Davlat rahbari bunday tajribani boshqa hududlarda ham kengaytirish, har bir viloyatdagi 2–3 ta texnikumda kasb bilan birga nemis tilini o‘rgatish zarurligini qayd etdi.
Shuningdek, Germaniyaning “Telk” kompaniyasi “Intil” xalqaro o‘quv markazida 100 nafar nemis tili o‘qituvchisini tayyorlashni boshlagan. Kelasi yil boshidan ularni hududlardagi texnikumlarga jalb qilish vazifasi qo‘yildi.
