Hisob palatasi 2022-yil uchun davlat byudjeti yuzasidan o‘z xulosasini eʼlon qildi. Unda davlat byudjeti hisobidan rivojlantirish dasturlari mavjud bo‘lmagan ayrim vazirlik va idoralarning maqsadli indikatorlari ularning strategik maqsadlaridan kelib chiqqan holda shakllantirilgan.
Maʼlum bo‘lishicha, 2022-yilda real o‘sish surʼati 5,9 foizni tashkil etishi prognoz qilingan. 2023-yilda 5 foiz, 2024-yilda ham 5 foiz miqdori qayd etilgan.
Elektr energiyasi va tabiiy gazni ichki isteʼmolchilarga sotish narxi, issiq suv va issiqlik, sovuq suv va kanalizatsiya tariflari oshishi kutilmoqda. Bu 2020-2021 yillarda ushbu resurslar narxlari o‘zgarmagani va keyingi yilda indeksatsiya qilinishi ko‘zda tutilayotgani bilan izohlangan.
Maʼlumot uchun: hisob palatasi tomonidan soliq solish bazasidagi o‘zgarishlar, ishlab chiqarish hajmlaridagi o‘sish ko‘rsatkichlari, soliq maʼmurchiligidagi o‘zgarishlar va soliq imtiyozlari tarkibi tahlil qilinib, byudjet daromadlari prognozi belgilanishida ayrim tushumlarning manbalari yetarli emasligi yoki to‘liq hisobga olinmaganligi aniqlanib, Loyihaga tegishli tuzatishlar kiritish tavsiya etildi.
Eslatib o‘tamiz, avvalroq Surxondaryo va Xorazmda elektr stansiyalari qurilishi, Toshkent shahrining ikki tumanida elektr taʼminotida avariyali uzilish kuzatilishi hamda Toshkentda issiqlik taʼminotini yaxshilash uchun qariyb 1,4 mlrd yevro sarflanishi kutilayotgani haqida xabar berilgandi.