Abduqodir Husanovning transfer qiymati so‘nggi yangilanishga ko‘ra 3 barobar oshib, 35 million yevroga yetdi. U avvalroq 12 million yevro bilan baholangan edi.
“Manchester Siti” futbolchisining ushbu o‘sishi uning Angliya Premer-ligasidagi o‘yinlari va fevral oyining eng yaxshi futbolchisi sifatida eʼtirof etilgani bilan bog‘liq.
Husanov qishda Angliyaga yo‘l olganidan so‘ng, 8 ta o‘yinda maydonga tushdi va 1 ta gol urdi. U himoyachi sifatida o‘zining ishonchli o‘yinlari bilan jamoaga katta foyda keltirmoqda. Uning transfer qiymati O‘zbekiston terma jamoasi tarixida eng yuqori baholangan futbolchi sifatida rekord o‘rnatdi.
Bungacha bu ko‘rsatkich Eldor Shomurodovga tegishli edi. U 2021 yilda “Jenoa”dan “Roma”ga 14 million yevroga ko‘chib o‘tgan edi. Hozirgi kunda Husanov nafaqat O‘zbekiston, balki Markaziy Osiyodagi eng qimmat futbolchi hisoblanadi. 20 mart kuni u O‘zbekiston terma jamoasi safida Qirg‘iziston bilan, 25 martda esa Eronga qarshi maydonga tushadi.