Bosh prokuratura axborot xizmati rahbari Hayot Shamsutdinovning maʼlum qilishicha, joriy yilning 21 sentyabr kuni soat 02:30 larda 21 yoshli haydovchi A.A. boshqa shaxsga tegishli bo‘lgan “Tracker” mashinasini Andijon tumani “Jahonobod” MFY hududida boshqarib borayotgan paytda boshqaruvni yo‘qotib, beton to‘siqqa urilgan. Oqibatda, haydovchi hodisa joyida vafot etgan.
Avtomashina salonida bo‘lgan 21 yoshli A.P., 20 yoshli A.Yu. va uning tengdoshi I.A. turli tan jarohatlari bilan shifoxonaga yotqizilgan. Shifokorlar tomonidan ko‘rsatilgan tibbiy muolajalarga qaramay, A.Yu. va I.A. shifoxonada vafot etgan.
Avtohalokat oqibatida vafot etgan yigitlarning barchasi Andijon tibbiyot institutining 3-kurs talabalari bo‘lgan.
Hozirda ushbu holat yuzasidan Andijon tuman IIB TB tomonidan tergov harakatlari olib borilmoqda. Shuningdek, Andijon viloyat prokuraturasi tomonidan nazorat o‘rnatilgan.
Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Eslatib o‘tamiz, avvalroq Surxondaryoda “Matiz” haydovchisi 12 yoshli qizni urib yuborgani hamda “Xalq so‘zi” gazetasi jurnalisti YTHga uchrab, vafot etgani haqida xabar berilgandi.
Cho‘lponoy Ahmedova