АҚШ Грузияни Саакашвилига нисбатан адолатли муносабатда бўлишга чақирди
Шунингдек, собиқ президентнинг суд мажлисларида иштирок этишига рухсат берилиши сўралган.
АҚШ давлат департаменти расмий вакили Нед Прайс Грузия ҳукуматидан Михаил Саакашвилига нисбатан адолатли бўлишни сўради. Бу ҳақда “РИА Новости” хабар берди.
Прайс Саакашвилига “адолатли ва шаънига доғ туширмасдан” муносабатда бўлиш зарурлигини қайд этган.
“Биз Грузия ҳукуматини жаноб Саакашвилининг барча суд мажлисларида иштирок этишини таъминлашга чақирамиз. Жаноб Саакашвили адолатли процесс ҳуқуқига эга, шунингдек, агар у буни истаса, суд мажлисларида шахсан иштирок этиши мумкин”, – деган у.
Маълумот ўрнида: Саакашвили 1 октябрь куни қамоққа олинган. У Грузияга 8 йиллик танаффусдан сўнг қайтиб келди. Саакашвили 2004-2013 йилларда мамлакатни бошқарган. Шундан кейин кейин у Украина фуқаролигини қабул қилган ва бир қанча лавозимларда ишлаган.
Аввалроқ Грузияда бир гуруҳ депутатлар Саакашвилини қўллаб-қувватлаб очлик эълон қилганди.
Жаҳонгир Қўзиев
