Грузияда бир гуруҳ депутатлар очлик эълон қилди
Уларнинг барчаси Саакашвилини бошқа касалхонага ўтказилишини талаб қилмоқда.
Грузия парламентининг тўққиз нафар депутати Михаил Саакашвилини қўллаб-қувватлаб очлик эълон қилди. Бу ҳақда “РИА Новости” хабар берди.
Уларнинг барчаси мухолиф партия вакиллари ҳисобланади. Депутатлар собиқ президентнинг зудлик билан кўп тармоқли фуқаролик клиникасига ўтказилишини талаб қилмоқда.
“Биз, парламентнинг тўққиз аъзоси Михаил Саакашвилини малакали тиббий хизматдан фойдаланиши учун кўп тармоқли клиникага ўтказилишини талаб қилиб очлик эълон қилишга қарор қилдик”, деган депутатлардан бири Давид Киркитадзе.
Маълумот ўрнида: Саакашвили 1 октябрь куни қамоққа олинган. У Грузияга 8 йиллик танаффусдан сўнг қайтиб келди. Саакашвили 2004-2013 йилларда мамлакатни бошқарган. Шундан кейин кейин у Украина фуқаролигини қабул қилган ва бир қанча лавозимларда ишлаган.
Аввалроқ Грузия хавфсизлик хизмати Саакашвили давлат тўнтариши уюштирмоқчи эканлиги ҳақида маълум қилганди.
Жаҳонгир Қўзиев
