Xabarda aytilishicha, T. ismli fuqaro Farg‘ona shahri “Qirguli” mavzesida joylashgan markaziy bozor oldida uch nafar sherigi bilan ko‘rishib, taksi chaqirishga va uning haydovchisini to‘nashga kelishib olgan. Shundan so‘ng ular taksi chaqirib, 150 ming so‘mga Quva tumani hududida joylashgan “Karkidon” suv omboriga borishlarini kelishgan.
Manzilgan yetib borgandan so‘ng yo‘lovchilardan biri haydovchiga ko‘ngli behuzur bo‘layotganini bahona qilib, mashinadan tushgan va yonidagi o‘tkir tig‘li jism bilan uning bo‘yniga urgan. Yigitning qolgan sheriklari ham haydovchini yerga tushirib, uni toshlar bilan urgan, oyoq qo‘llariga tan jarohati yetkazgan va uni hushsiz holda tashlab ketgan.
Mazkur holat yuzasidan 20 iyul kuni Farg‘ona viloyati prokuraturasi tomonidan Jinoyat kodeksining 97 (qasddan odam o‘ldirish) va 164-moddalari (bosqinchilik) bilan jinoyat ishi qo‘zg‘atilgan.
Jinoyat ishi doirasida 4 nafar shaxs (3 nafari voyaga yetmagan) gumonlanuvchi tariqasida protsessual tartibda ushlangan. Hozirda tergov harakatlari olib borilmoqda.
