Farg‘ona viloyati, Beshariq tumanida mahalliy ariqdan shaxsi nomaʼlum bolaning jasadi topildi. Bu haqda Bosh prokuratura maʼlum qildi.
Murdani 24 mart kuni soat 21:00 da “Qo‘rg‘oncha” mahallasi hududidan oqib o‘tuvchi ariqda mahalliy aholi aniqlab, huquq-tartibot idoralariga xabar bergan. Shundan so‘ng tezkor-tergov guruhi hodisa joyiga yetib borib, o‘lim sabablarini o‘rganishga kirishgan.
Dastlabki ekspertiza natijalariga ko‘ra, bolaning tanasida zo‘ravonlik yoki shikastlanish alomatlari aniqlanmagan. O‘limga suv bilan nafas yo‘llarining berkilishi sabab bo‘lgani maʼlum qilingan.
Hozirda huquq-tartibot organlari bolaning shaxsini aniqlash va uning ariqqa qanday tushib ketganini o‘rganish uchun surishtiruv ishlarini davom ettirmoqda. Shuningdek, hududda bedarak yo‘qolgan bolalar haqidagi maʼlumotlar o‘rganilmoqda.