Farg‘ona viloyatining Uchko‘prik tumanida yashovchi, 2003 yilda tug'ilgan U.M. internet tarmog‘i orqali yot g‘oyalar taʼsiriga tushib qolishi natijasida, Suriyadagi “Islom davlati” xalqaro terroristik tashkiloti aʼzolari safiga qo‘shilish maqsadida 2021 yilning aprel oyida Turkiya davlatiga boradi. Biroq u yerdan Suriya hududiga o‘ta olmagach, sentyabr oyida doimiy yashash manziliga qaytib keladi.
So‘ngra Qo‘qon shahri va Uchko‘prik tumanida istiqomat qiluvchi yaqin aloqalaridan iborat yashirin “jamoat” tuzib, ular orasida “Islom davlati” terroristik tashkiloti g‘oyalarini targ‘ib qila boshlaydi.
Aniqlanishicha, mazkur shaxs o‘zining uyali telefoni orqali ijtimoiy tarmoqlardagi aqidaparastlik g‘oyalari bilan yo‘g‘rilgan audio va video materiallarni tinglab, tomosha qilib, ularning taʼsirida “jamoat” aʼzolari orasida “jihod” hamda “shahid”likka chorlovchi audiosuhbatlar olib boradi.
Vazirlar Mahkamasi huzuridagi Din ishlari bo‘yicha qo‘mitaning ekspertiza xulosasiga ko‘ra, “U.M.”ning uyali telefoni xotirasidagi maʼlumotlar o‘zining mohiyati va mazmuni, ularda ilgari surilgan g‘oyalar jihatidan O‘zbekiston Respublikasida jamoat xavfsizligi va tartibiga tahdid soluvchi materiallar sirasiga kirib, aqidaparastlik g‘oyalari bilan yo‘g‘rilgan hisoblanadi.
Taʼkidlash lozimki, ushbu maʼlumotlarni O‘zbekiston Respublikasiga olib kirish, tayyorlash va tarqatish taqiqlanadi.
Hozirda “U.M.” va uning aloqalariga nisbatan qo‘zg‘atilgan jinoyat ishi doirasida tergov-surishtiruv harakatlari olib borilmoqda.
P.S.: Bilib-bilmay qilingan xato sabab yoki diniy ilmni noto‘g‘ri targ‘ib qilish oqibatida guldek umrlar xazonga aylanmoqda. Yigit bo‘lib, ota-onaga yordam berish, oila deb atalmish muqaddas qo‘rg‘onga qanot bo‘lib, elu-yurtga xizmat qilish o‘rniga yoshlikning noyob davrlarini panjara ortida o‘tkazish naqadar azob. To‘g‘ri yo‘ldan adashmaslik, umrni sarobga aylantirmaslik esa har kimning o‘z qo‘lida.