Грецияда поездлар тўқнашуви: вокзал бошлиғи ҳибсга олинди
Мамлакат транспорт вазири эса ўз ихтиёри билан истеъфога чиқди.
Грециянинг Hellenic Train темир йўл компанияси чоршанба куни Лариса шаҳри яқинида йўловчи ва юк поездларининг тўқнашуви туфайли 14 та йўналишдаги поездлар ҳаракатини бекор қилди. Шунингдек, Лариса шаҳридаги станция раҳбари ҳибсга олингани ҳақида маълумот бор. Бу ҳақда euronews.cоm хабар берди.
Эслатиб ўтамиз, кеча Лариса шаҳри яқинидаги Темпе аҳоли пункти ҳудудида йўловчи ва юк поездлари бир йўлда бўлган. Биринчиси Афинадан Салоникига, иккинчиси — тескари йўналишда.
Тўқнашув вақтида поездларнинг биринчи вагонлари тўлиқ эзилган, зарбадан ғилдираклар ва корпуснинг бўлаклари темир йўлдан 100 М масофага отилиб кетган. Воқеа содир бўлганидан сўнг дарҳол ёнғин бошланди.
Греция инфратузилмалар ва транспорт вазири Костас Караманлис камида 40 кишининг ҳаётига зомин бўлган йўловчи поезди ҳалокатидан кейин истеъфога чиқди.
Йўловчи поездида 350 га яқин одам бўлган. Хабарларга кўра, уларнинг аксарияти Лент карнавалидан қайтган талабалардир. У 4 йил ичида биринчи марта ўтказилди.
Греция Бош вазири Кириакос Мицотакис фожиа содир бўлган жойга борган ва мамлакатда уч кунлик мотам эълон қилинган.
