Kecha, 9 noyabr kuni Oliy sudda Baxtiyor Islomov hamda advokatlar palatasi raisi Shuhrat Sodiqov respublikada faoliyat yuritayotgan advokatlar bilan ochiq muloqot o‘tkazdi.
“Oliy sud raisi Baxtiyor Islomov bugun advokatlar hamjamiyati vakillari bilan bo‘lib o‘tgan ochiq muloqot chog‘ida ikki marta ʼhaqiqiy aybdorni jazolash uchun sudyalarimizda qatʼiyat yetishmayaptiʼ dedi. Rais bu haqda birinchi marta advokat so‘roviga javob bermagan yoki yetarlicha javob bermayotgan mansabdor shaxslarni Maʼmuriy javobgarlik to‘g‘risidagi kodeksning 197-1-moddasi bo‘yicha javobgarlikka tortish masalasi haqida gap ketganida gapirgan bo‘lsa, qamoqqa olish ehtiyot chorasini qo‘llash haqidagi iltimosnomalar sudlar tomonidan deyarli yoppasiga qanoatlantirilayotgani masalasi ko‘tarilganida ham shu gapni takrorladi”, deyiladi bu haqda yozgan “Advokat” jurnali va “Advokat-Press” gazetasining Telegram kanalidagi xabarda.
Oliy sud raisiga ko‘ra, ko‘pincha advokat so‘roviga javob bermagan aybdor mansabdor shaxs qolib, ish yurituvchi, yordamchi kabi javob qaytarishga vakolatli bo‘lmagan xodimlar javobgarlikka tortilmoqda.
“Bu muammodan xabarimiz bor. Shaxsga doir maʼlumotlarni bahona qilib, advokatlarning shikoyatlari qabul qilinmayapti yoki qabul qilinsa ham ko‘p hollarda aybdor mansabdor shaxs qolib ish yurituvchi, yordamchi kabi advokat so‘roviga javob qaytarishga vakolatli bo‘lmagan xodimlar javobgarlikka tortilmoqda. Haqiqiy aybdorni jazolash uchun sudyalarimizda qatʼiyat yetishmayapti”, degan Oliy sud raisi.
Baxtiyor Islomov respublikada sudya kadrlarga o‘tkir ehtiyoj yo‘qligini, har yili yetarlicha sudya shtatlari ochilayotganini, biroq ularning malakasi hali talab darajasida emasligini tan olgan.