Ҳиндистон самолёти Покистонга фавқулодда қўнди
Икки мамлакат ўртасида авиация бўйича алоқалар йўқ.
Ҳиндистоннинг IndiGo хусусий авиакомпанияси самолёти бортда йўловчи ҳалок бўлгани сабабли Покистонга фавқулодда қўнди. Бу ҳақда «Корреспондент» нашри ёзмоқда.
Ҳодиса бугун эрталаб бортида 163 нафар йўловчиси билан Деҳлидан Доҳага учган самолётда содир бўлган. Учувчи нигериялик йўловчининг “нафас олишдан тўхтагани” ҳақида хабарни олгандан сўнг самолётни Карачига бурган. Покистон фуқаро авиацияси бошқармасининг аниқлик киритишича, 60 ёшли эркакнинг саломатлиги парвоз вақтида ёмонлашган, шундан сўнг капитан Карачи авиадиспетчерига мурожаат қилиб, шифокор ва тез ёрдам чақиришни сўраган. Текширувдан сўнг аэропортнинг тиббий гуруҳи йўловчининг ўлганини эълон қилган.
Эслатиб ўтамиз, Ҳиндистон ва Покистон ўртасида муносабатлар кескинлашган: улар 1947 йилдан бери уч марта уруш олиб боришган. Ҳозирда мамлакатлар ўртасида тўғридан-тўғри рейслар мавжуд эмас.
