Ҳиндистонда тиқилинч сабаб 15 киши ҳалок бўлди
Яна кўплаб одамлар касалхонага ётқизилган.
Ҳиндистоннинг Уттар-Прадеш штатида ўтказилган Kumbh Mela фестивалида 15 киши тиқилинч сабаб ҳалок бўлди.
Маҳаллий нашрларга кўра, яна кўплаб ташриф буюрувчилар жароҳатланган ва касалхонага ётқизилган. Улардан айримларининг аҳволи оғир деб баҳоланмоқда.
Маълумот учун, Kumbh Mela фестивали ҳар 12 йилда бир марта ўтказилади. 13 январь куни тадбир бошланганидан бери 110 миллиондан ортиқ одам байрамда иштирок этишди. Фестивалнинг 45-кунида ташриф буюрувчилар сони 450 миллион кишига етиши кутилмоқда.
Одамлар Ганг ва Ямуна дарёларининг қўшилиш жойи бўлган Цангамда маросим амалларини бажариш учун ташриф буюришади. Унда одамлар чўмилиш орқали барча гуноҳларидан фориғ бўлади деб ҳисобланади.
