Инглиз жамоаси Килиан Мбаппени текинга сотиб олмоқчи
«Ливерпул» француз ҳужумчиси Килиан Мбаппе учун курашга қўшилди. Хабарларга кўра, клуб кейинги йилга Мбаппенинг парижликлар билан шартномаси тугашини ҳисобга олиб, уни текинга сотиб олмоқчи.
Аввалроқ, Мбаппе «ПСЖ» билан шартномани узайтирмоқчи эмаслиги ҳақида хабар берилганди. Ҳозирча футболчи кейинги фаолиятини «Реал Мадрид» клубида ҳам давом эттириши айтилмоқда.
Мбаппенинг «ПСЖ» билан амалдаги шартномаси 2022 йилнинг 30 июнигача амал қилади. Килиан «ПСЖ» сафида 2017 йилдан буён тўп суриб келмоқда. Бундан олдин у «Монако» клуби шарафини ҳимоя қилган. Ҳужумчи Франция чемпионатининг сўнгги мавсумида 31 учрашувда иштирок этиб, 27 голга муаллифлик қилди ва 7 та узатмани амалга оширди.
Шунингдек, у Чемпионлар лигасининг 10 та ўйинида саккизта гол урди.
Жамшид Амиров
