“Innovatsion g‘oyalar yetakchisi” ko‘krak nishoni bilan innovatsion g‘oya va texnologiyalarni rivojlantirish, amaliyotga tatbiq etishga munosib hissa qo‘shgan iqtidorli yoshlar, yosh olimlar, talabalar va tashabbuskor fuqarolar taqdirlanadi.
Maqsad innovatsion g‘oya va texnologiyalarni rivojlantirish, amaliyotga tatbiq etishga munosib hissa qo‘shib kelayotganlarning innovatsion faoliyatini rag‘batlantirish va erishgan yutuqlarini munosib taqdirlashdan iborat.
Maʼlumotlarga ko‘ra, tanlovga respublika miqyosida 100 ga yaqin nomzodlardan hujjat topshirilgan. Yakuniy natijalarga ko‘ra, eng yuqori ball to‘plagan 14 nafar nomzod “Innovatsion g‘oyalar yetakchisi” ko‘krak nishoni g‘olibi deb topiladi.
Ko‘krak nishoni bilan taqdirlangan shaxslar bazaviy hisoblash miqdorining yigirma baravari miqdorida bir yo‘la to‘lanadigan pul mukofoti bilan taqdirlanadilar.
Maʼlumot uchun, “Innovatsion g‘oyalar yetakchisi” ko‘krak nishoni O‘zbekiston Respublikasi Vazirlar Mahkamasining 2018 yil 2 oktyabrdagi “Innovatsion g‘oyalar yetakchisi” ko‘krak nishonini taʼsis etish chora-tadbirlari to‘g‘risida” 786-son qarori bilan taʼsis etilgan.