Жиззахдаги “газ заправка”да портлаш содир бўлди
Ҳолат бўйича вилоят ФВБ маълумот берди.
Жиззах вилоятининг Шароф Рашидов туманида 23 июнь куни автомобилларга газ тўлдириш шохобчасида портлаш юз берду. Бу ҳақда вилоят Фавқулодда вазиятлар бошқармаси Матбуот хизмати маълум қилди.
Қайд этилишича, кеча соат 15:00 атрофида Шароф Рашидов тумани “Совунгарлик” МФЙ ҳудудида жойлашган автомобилларни газ билан тўлдириш компрессор стансиясида “ВАЗ-2106” русумли транспорт воситасига ёнилғи тўлдириш жараёнида портлаш содир бўлган.
“Ҳодиса оқибатида ҳеч ким жабрланмаган, бошқа транспорт воситаларига зарар етмаган. Жабрланганлар йўқ. Портлаш натижасида ёнғин келиб чиқмаган, ёнғин-қутқарув бўлинмалари ҳодиса жойига чиқарилмаган”, — дейилади хабарда.
Дастлабки маълумотларга кўра, ҳодисага “ВАЗ-2106” автомашинасидаги носозлик сабаб бўлган. Ҳозирда суриштирув ишлари давом этмоқда.
Эслатиб ўтамиз, бундан олдин Тошкент вилоятининг Олмалиқ шаҳридаги корхонада кучли портлаш рўй берганди. Оқибатда цехнинг бино конструкциялари бузилган.
