Криштиану Роналду фаолиятидаги 903-голга муаллифлик қилди
У "Ал-Наср" сафидаги 17-пенальтисини ҳам аниқ амалга оширди.
Футбол бўйича Саудия Про Лигасининг 5-турида "Ал-Наср" "Ал-Ваҳда"ни ишончли ҳисобда мағлуб этди. Ар-Риёд клуби ҳужумчиси Криштиану Роналду 56-дақиқада пенальтидан гол урди. Шу тариқа португалиялик футболчи фаолиятидаги 903-голига ва клублар миқёсида 771-голига муаллифлик қилди.
Роналду "Ал-Наср" сафидаги 17-пенальтисини ҳам аниқ амалга оширди. Бутун фаолияти давомида Криш 196 та пенальти тепган ва уларнинг 166 таси дарвозадан жой олган.
Жорий мавсумда 39 ёшли форвард клуб ва терма жамоада 9 та ўйин ўтказиб, 8 та голга муаллифлик қилди. Чемпионатда эса голлари сонини 4 тага етказди ва тўпурарлар рўйхатида 3-ўринда бормоқда.
