Fransiya prezidenti Emmanuel Makron 16 iyul kuni bosh vazir Gabriel Attal va u rahbarlik qilayotgan vazirlar mahkamasi isteʼfosini qabul qildi. Biroq Fransiya hukumati yangi vazirlar mahkamasi tayinlanmaguncha o‘zining hozirgi tarkibida ishlashda davom etadi.
"Ushbu davr imkon qadar tezroq tugashi uchun respublikaning siyosiy kuchlari birgalikda harakat qilib, fransuz xalqi manfaatlariga mos keladigan loyiha va qarorlar atrofida birlashgan front yaratishi kerak", — deyiladi Yelisey saroyi bayonotida.
Fransiya bosh vaziri Attal 8 iyul kuni, parlament saylovlari natijalari maʼlum bo‘lganidan ko‘p o‘tmay, prezident Makronning markazchi bloki ikkinchi o‘rinni egallab, Milliy assambleyadagi ko‘pchilikni yo‘qotganidan so‘ng isteʼfoga chiqish haqida ariza berdi. Biroq Fransiya prezidenti bu iltimosni rad etdi.