Макрон Франция ҳукуматининг истеъфосини қабул қилди
Габриэл Аттал ҳукумати Франциянинг янги вазирлар маҳкамаси тайинланмагунча ишлашда давом этади.
Франция президенти Эммануэл Макрон 16 июль куни бош вазир Габриэл Аттал ва у раҳбарлик қилаётган вазирлар маҳкамаси истеъфосини қабул қилди. Бироқ Франция ҳукумати янги вазирлар маҳкамаси тайинланмагунча ўзининг ҳозирги таркибида ишлашда давом этади.
"Ушбу давр имкон қадар тезроқ тугаши учун республиканинг сиёсий кучлари биргаликда ҳаракат қилиб, француз халқи манфаатларига мос келадиган лойиҳа ва қарорлар атрофида бирлашган фронт яратиши керак", — дейилади Елисей саройи баёнотида.
Франция бош вазири Аттал 8 июль куни, парламент сайловлари натижалари маълум бўлганидан кўп ўтмай, президент Макроннинг марказчи блоки иккинчи ўринни эгаллаб, Миллий ассамблеядаги кўпчиликни йўқотганидан сўнг истеъфога чиқиш ҳақида ариза берди. Бироқ Франция президенти бу илтимосни рад этди.
