Bokschi ringdagi oxirgi jangini 2021 yil 22 avgustda WBA‘ning superchempion unvoni uchun kubalik Yordenis Ugasga qarshi o‘tkazib, mag‘lubiyatga uchragan. Bu Pakyaoning 2019 yil iyul oyida WBA chempionlik kamari uchun Keyt Turmanni mag‘lubiyatga uchratganidan keyingi birinchi jang edi.
“Bokschilik faoliyatim yakunlandi, men bu qarorni boks bilan anchadan beri shug‘ullanishim va oilam menga u bilan yetarlicha shug‘ullanganimni aytayotgani sababli qabul qildim. Men Filippin prezidenti lavozimi uchun kurash olib borishga chorlovni ko‘rqmay qabul qilaman. Bizga taraqqiyot kerak, biz kambag‘allikni yengishimiz lozim. Bizga hukumatimiz xalqqa halol va ochiq-oydin xizmat qilishi kerak. Mavridi keldi va men o‘z zimmamga yetakchilik yukini olishga tayyorman”, deydi bokschi.
Ayni vaqtda Pakyao Filippin senati aʼzosi hisoblanadi, uning vakolatlari muddati 2022 yilda yakunlanadi.
Hozirda Filippin prezidenti Rodrigo Duterte hisoblanadi. Mamlakat konstitutsiyasiga ko‘ra, Duterte ikkinchi muddatga prezident lavozimini egallay olmaydi. Shu sababli u bo‘lg‘usi saylovlarda vitse-prezident lavozimi uchun kurashmoqchi.
Maʼlumot uchun, Menni Pakyao ikki yillik tanaffusdan so‘ng ringga qaytdi. Tanaffusdan so‘nggi ilk ringida mag‘lubiyatga uchradi. Kubalik Yordenis Ugas bir ovozdan qabul qilingan qaror bilan g‘alaba qozonib, WBA (super) vazn toifasida chempionlik unvonini saqlab qoldi.
Eslatib o‘tamiz, avvalroq sakkizta vazn bo‘yicha boks sobiq chempioni Menni Pakyao va WBC va IBF yo‘nalishlari chempioni Errol Spens o‘rtasidagi jang bekor qilingani haqida xabar berilgandi.