Ijtimoiy tarmoqda “propan” gaz narxlarining keskin oshganligi yuzasidan eʼtirozlar tarqalib, jamoatchilik tomonidan muhokamalarga sabab bo‘lmoqda. Holatga Raqobat qo‘mitasi munosabat bildirdi.
Qayd etilishicha, qo‘mita tovar-xom ashyo birjalari orqali realizatsiya qilinishi belgilangan suyultirilgan gaz mahsulotining qo‘yilishi va sotilishi yuzasidan tegishli o‘rganishlarni olib bormoqda.
“O‘rganish yakunlari yuzasidan qo‘shimcha maʼlumot taqdim etiladi”, deyiladi rasmiy munosabatda.
Taʼkidlanishicha, Raqobat qo‘mitasi o‘z funksiyalaridan kelib chiqqan holda birja savdolarida sotilayotgan yuqori likvidli mahsulotlarning realizatsiyasi holatini doimiy tahlil qilib keladi, xususan, suyultirilgan gazning narxlarini oshishi mumkinligini oldindan prognoz qilgan holda, uning narxini barqarorlashtirishni taʼminlash maqsadida tegishli choralar ko‘rish yuzasidan masʼul regulyatorga xabar yuborilgan.