Муроджон Аҳмадалиев АҚШга жўнаб кетди
Навбатдаги жанг санаси малум эмас.
Бугун, 25 февраль куни тунда Ислом Каримов номидаги Халқаро аэропортдан WBA ва IBF чемпиони Муроджон Аҳмадалиев чемпионлик камарини ҳимоя қилиш учун Америка Қўшма Штатларига жўнаб кетди.
Наманганлик боксчини кузатиб қўйиш учун яқинлари, дўстлари ва ОАВ вакиллари аэропортга чиқишди.
Муроджон Аҳмадалиев:
“Америкага учиб кетяпман. Рақибим аниқ, яъни америкалик Ронни Риос, бироқ жанг санаси маълум эмас. Худо хоҳласа жанг куни аниқ бўлса, халқимизга эълон қиламиз. Ўзбекистонда жанг қилиш ниятим бўлди, аммо бу ҳимоя жанги – бутун дунё кузатади”.
Бундан ташқари боксчининг онаси ҳам бўлиб ўтадиган жангга ўз муносабатини билдирган:
“Жангдан бир кун олдин фарзандим билан гаплашаман. Ортингда президент турибди, ютишинг керак! деб таъкидлайман. Жанг бошланганда кўрмай, кўчани супуришга чиқиб кетаман, кейин натижасини биламан”.
Маълумот ўрнида: Муроджон Аҳмадалиев чемпионлик камарини ҳимоя қилиш учун америкалик Ронни Риосга қарши жанг қилади. Боксчининг маълум қилишича, ушбу жанг АҚШнинг Лас-Вегас шаҳрида бўлиб ўтади, аммо жанг санаси ҳозирча маълум эмас.
