Joriy yilning 26-fevral kuni 16 yoshli fuqaro Namangan shahrining Zirabuloq ko‘chasida joylashgan uylar oralig‘ida o‘z tengqurining ko‘krak qafasiga pichoq bilan urib, tan jarohati yetkazgan. Ma’lum qilinishicha, jabrlangan fuqaro uni pichoqlagan bolaning “uyali telefoniga qo‘ngiroq qilib, shaxsiyatiga tegib haqorat qilgan” va o‘rtada tortishuv yuzaga kelgan.
Hodisa oqibatida pichoqlangan bola og‘ir tan jarohatlari bilan Respublika shoshilinch tibbiy yordam ilmiy markazi Namangan filialining jonlantirish bo‘limiga yotqizilgan.
Holat yuzasidan Namangan shahar IIO FMB huzuridagi Tergov bo‘limi tomonidan O‘zbekiston Respublikasi Jinoyat kodeksning tegishli moddasi bilan jinoyat ishi qo‘zg‘atilgan. Jinoyat kodeksining normalariga ko‘ra, jinoyatni sodir etgan shaxs 5 yildan 8 yilgacha ozodlikdan mahrum qilish bilan jazolanishi mumkin.