Наманганда 16 ёшли бола ўз тенгқурини пичоқлаб қўйди
Унга нисбатан 5 йилдан 8 йилгача озодликдан маҳрум қилиш жазоси қўлланиши мумкин.
Жорий йилнинг 26 февраль куни 16 ёшли фуқаро Наманган шаҳрининг Зирабулоқ кўчасида жойлашган уйлар оралиғида ўз тенгқурининг кўкрак қафасига пичоқ билан уриб, тан жароҳати етказган. Маълум қилинишича, жабрланган фуқаро уни пичоқлаган боланинг “уяли телефонига қўнгироқ қилиб, шахсиятига тегиб ҳақорат қилган” ва ўртада тортишув юзага келган.
Ҳодиса оқибатида пичоқланган бола олган оғир тан жароҳатлари билан Республика шошилинч тиббий ёрдам илмий маркази Наманган филиалининг жонлантириш бўлимига ётқизилган.
Ҳолат юзасидан Наманган шаҳар ИИО ФМБ ҳузуридаги Тергов бўлими томонидан Ўзбекистон Республикаси Жиноят кодекснинг тегишли моддаси билан жиноят иши қўзғатилган. Жиноят кодексининг нормаларига кўра, жиноятни содир этган шахс 5 йилдан 8 йилгача озодликдан маҳрум қилиш билан жазоланиши мумкин.
