Навоийда 33 ёшли эркак ўлдирилиб, дарёга ташлаб юборилди
Ҳозирда унинг мурдаси қидирилмоқда.
Кармана тумани Катта мачит маҳалласида яшовчи эркак қотиллик қурбони бўлди. Навоий вилояти ИИБ ахборот хизмати ҳам буни тасдиқлади.
Марҳумнинг яқинларига кўра, 1991 йилда туғилган Д.К. “Навоий-Тошкент” йўналишида қатнайдиган автобусларнинг бирида йўловчиларни йўналтирувчи (пасадчик) бўлиб ишлаган. 29 ноябрдан 30 ноябрга ўтар кечаси ярим тунда ишдан уйига келган Д.К. турмуш ўртоғини бошқа эркак билан кўрган.
“Ўша куни эрининг уйга қайтишини кутмаган аёл ва унинг таниши вазиятдан чиқиб кетиш мақсадида қотилликка қўл урган. Хонадонда бақир-чақир бўлган. Бизга айтишларича, гумондорларнинг бири Д.К.нинг оғзини ёпиб турган, иккинчиси ип билан бўйнидан бўғиб ўлдирган.
Сўнгра аёл 3-4 кун турмуш ўртоғини излаган бўлган, йўқолиб қолди деб ИИБга хабар берган”, дейди марҳумнинг яқинларидан бири.
Қотиллик содир этилган тунда Д.К.нинг бақирганини эшитган қўшниси бу ҳақида кўрсатма бергач, аёл ва унинг хуштори жиноятда гумонланиб қўлга олинган ва қамоқ эҳтиёт чораси қўлланган. Улар Д.К.ни ўлдириб, дарёга ташлаб юборишганини тан олган.
