Нефт нархи 3 йиллик рекордни янгилади
5 июлда Лондоннинг ICE биржасида Brent нефти нархи 1,3 фоизга кўтарилиб, 2018 йил 30 октябрдан бери илк бор бир баррели учун 77 доллардан ошди.
5 июлда Лондоннинг ICE биржасида Brent нефти нархи 1,3 фоизга кўтарилиб, 2018 йил 30 октябрдан бери илк бор бир баррели учун 77 доллардан ошди.
Савдолар вақтида Brent туридаги нефт нархи 77,13 долларгача етган. Ушбу нефт охирги марта 2018 йил октябр охирида 77 доллардан юқорироқ турган.
WTI нефти нархи эса 1,6 фоизга ошиб, 76,32 долларга етган.
Bloomberg ахборот агентлигининг хабар қилишича, нефт нархи ошиши ОПЕК+ иштирокчилари ўртасидаги келишмовчилик билан боғланган. 5 июлда Венада нефт қазиб олувчи давлатлар иштирокида бир неча кун давом этган музокаралар ўз якунига етди. Бироқ учрашув иштирокчилари Саудия Арабистони ва БАА ўртасида юзага келган келишмовчиликни енгиб ўта олишмаган.
Бундан ташқари, ОПЕК+нинг кейинги учрашуви қачон ўтиши бўйича бир тўхтамга келинмаган. Музокаралардаги муваффақиятсизлик алянс август ойида нефт ҳажмини оширмаслигини англатади. Бу эса пандемиядан кейин жаҳон иқтисодиёти тикланаётган вазиятда бозорда нефт танқислигини юзага келтириши мумкин.
Аввалроқ Bank of America таҳлилчилари нефт нархи 100 долларгача кўтарилишини прогноз қилишган. Уларнинг фикрича, бунинг учун 6та сабаб бор. Улардан 3таси талаб, яна 3таси эса таклиф билан боғланган.
