Озарбайжон ва Арманистон ўртасида яна можара бошландими?
Икки томон бир-бирини ўт очишда айбламоқда
15 июль, шанбага ўтар кечаси Озарбайжоннинг Арманистон билан чегарадаги позициялари арман томонидан интенсив ўққа тутилди, деб хабар бермоқда Озарбайжон Мудофаа вазирлиги.
“Озарбайжон армиясининг Калбажар вилоятининг Зайлик аҳоли пункти йўналишида жойлашган позицияларига турли ўқотар қуроллардан ҳужум қилинди”, — дейилади ҳарбий департамент хабарида.
Мудофаа вазирлигининг қўшимча қилишича, Озарбайжон армияси томонидан кўрилган тегишли жавоб чоралари натижасида душман ҳаракати бостирилган.
Арманистон Мудофаа вазирлиги ҳам Озарбайжон томони чегаранинг шарқий йўналишида арман ҳарбийларининг позицияларини ўққа тутаётгани ҳақида хабар берган. Вазирлик хабарига кўра, чегара ҳудудларини ўққа тутиш шанбага ўтар кечаси ва йирик калибрли ўқ отиш қуролларидан амалга оширилган.
