Xabarlarga ko‘ra, agar hujumchi Kilian Mbappe “Real Madrid” klubiga o‘tadigan bo‘lsa, 21 yoshli hujumchi parijliklar uchun ustuvor variant bo‘ladi. “PSJ” norvegiyalik agent Mino Rayola bilan muzokaralarni allaqachon boshlab yuborgan.
“PSJ” Erlingga bonuslar hisobga olinmagan holda yiliga 38 dan 42 million yevrogacha bo‘lgan eng yuqori maoshni taklif qilishga tayyor. Parij klubi hozirda 2 + 1 shartnomasini ko‘rib chiqmoqda.
Holandning Dortmundning “Borussiya” klubi bilan shartnomasi 2024 yilda yakuniga yetadi. Biroq bekor qilish bandiga ko‘ra, norvegiyalik 2022 yil iyun oyida 75 million yevro evaziga jamoani tark etishi mumkin. Agar mavsum davomida baʼzi maqsadlarga erishilsa, bu summa 90 million yevrogacha o‘sadi.
Futbolchiga, shuningdek, “Chelsi”, “Yuventus”, “PSJ”, “Real”, “Barselona”, “Manchester Siti” va “Manchester Yunayted” jamoalari ham qiziqish bildirgan edi.
Avvalroq Messi braziliyalik hakamni xayolparastlikda ayblagani va “Bavariya” Levandovski o‘rniga Holandni sotib olmoqchi ekanligi haqida xabar berilgandi.
Jamshidbek Amirov