Путин: "Мен махсус ҳарбий операция ўтказишга қарор қилдим"
Шунингдек, у русларга ҳам алоҳида мурожаат қилиб “куч адолат ва ҳақиқатда” деб эслатди.
Россия президенти Донбассда ҳарбий операция бошланганини маълум қилди. Президентнинг 24 февралдаги халққа мурожаати федерал телевидение орқали намойиш этилди.
Владимир Путинга кўра, Россия Федерацияси ва “Украинадаги миллатчи кучлар” ўртасида тўқнашув бўлиши муқаррар. Давлат раҳбари Россия қўшни давлатни босиб олиш ниятида эмаслигини айтган. Унинг таъкидлашича, операциядан мақсад Украинани қуролсизлантиришдир.
У ташқи кучларни Россия Федерация ишларига аралашишга уринишдан огоҳлантирди. Давлат раҳбари Москва барча сценарийларга тайёр эканини таъкидлади.
“Бирлашган Миллатлар Ташкилоти Низомининг 51-моддасига кўра, Федерация Кенгашининг рухсати билан мен махсус ҳарбий операция ўтказишга қарор қилдим”, — деди Владимир Путин “Россия 24” телеканали орқали эфирга узатилган мурожаатида.
Президент, шунингдек, украиналик ҳарбийларга мурожаат қилди: “Сиз хунтага эмас, халққа қасамёд қилдингиз. Зудлик билан қуролларингизни ташлаб, уйингизга қайтишингизни сўрайман”.
Ҳозирги пайтда Россия артиллерияси Украинанинг бошқа шаҳарлари: Киев, Харьков, Бердянск каби шаҳарларига ҳам снарядлар отишни бошлади.
Эслатиб ўтамиз, аввалроқ Трамп Путинни ақлли йўл тутгани ҳақида хабар берилганди.
