Rossiya prezidenti Vladimir Putin Tojikiston prezidenti Emomali Rahmonni Rossiyaning III darajali “Vatan oldidagi xizmatlari uchun” ordeni bilan taqdirladi. Tegishli farmoni 4 oktyabr kuni eʼlon qilindi.
“Rossiya Federatsiyasi va Tojikiston Respublikasi o‘rtasidagi strategik sheriklik va ittifoqchilik munosabatlarini mustahkamlash, shuningdek, mintaqaviy barqarorlik hamda xavfsizlikni taʼminlashga qo‘shgan katta shaxsiy hissasi uchun Tojikiston Respublikasi prezidenti Rahmon Emomali III darajali “Vatan oldidagi xizmatlari uchun” ordeni bilan taqdirlansin”, — deyiladi hujjatda.
Emomali Rahmon bugun, 5 oktyabr kuni 70 yoshga to‘ladi. 2017 yilda u Rossiya va Tojikiston o‘rtasidagi ikki tomonlama munosabatlar va hamkorlikni mustahkamlashga qo‘shgan katta shaxsiy hissasi uchun Aleksandr Nevskiy ordeni bilan ham taqdirlangan.