ДХХ томонидан қалбаки пул ишлаб чиқараётган шахслар аниқланди
Бош прокуратура ҳузуридаги департаментнинг Пискент туман бўлими томонидан ДХХнинг тошкент вилояти бошқармаси билан ҳамкорликда ўтказилган тезкор тадбирда қалбаки пул ишлаб чиқараётган шахслар қўлга олинган.
Аниқланишича, фуқаро Ш.С. 100 минг сўмлик купюрадаги жами 48,9 миллион сўм қалбаки пулларни ўтказиш мақсадида ёнида олиб юрган вақтида ушланган. Ижарада яшаб келаётган хонадони кўздан кечирилганда, Ш.С.нинг шериклари М.Ў., С.М. ва А.А.лар томонидан компьютер техникаси ёрдамида тайёрланиб, рангли принтерда чоп этилган яна 2,5 миллион сўм қалбаки пуллар мавжудлиги аниқланиб, ашёвий далил сифатида олинган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.
Аввалроқ сохта валюталарни олиб киришга бўлган уринишларнинг олди олингани ҳақида хабар берилганди.
