Россиядаги ноқонуний украиналиклар учун талаблар белгиланди
2025 йил 10 сентябргача мақомини қонунийлаштириш шарт.
Россия президенти Владимир Путин Россия ҳудудида ноқонуний яшаётган Украина фуқаролари 2025 йил 10 сентябрга қадар ҳуқуқий мақомини тартибга солиши ёки мамлакатни тарк этиши шартлиги ҳақидаги фармонни имзолади.
Хабарларга кўра, фармон Россия Федерациясининг миграция сиёсатини такомиллаштириш мақсадида қабул қилинган ва расмий ҳуқуқий ахборот порталида эълон қилинган.
Ҳужжатга кўра, Россияда яшаш учун расмий асосга эга бўлмаган украиналиклар белгиланган муддатгача мамлакатни ўз ихтиёри билан тарк этиши ёки яшаш мақомини қонунийлаштириши лозим.
Шунингдек, Ички ишлар вазирлигига 2025 йил 10 сентябрга қадар ҳужжат топширган украиналикларга бармоқ излари, суратга олиш ва тиббий текширувдан ўтиш жараёнида миграция қоидаларини бузганлик учун жазо қўлламаслик бўйича кўрсатма берилди.
Бундан ташқари, Россия Соғлиқни сақлаш вазирлиги мазкур муддат ичида Украина фуқароларининг тиббий кўрикдан ўтишини таъминлаши лозим.
Эслатиб ўтамиз, 2024 йил февраль ойидан буён Россияда ноқонуний мигрантларни депортация қилиш тартиби жорий этилган. Уларга 30 апрелгача мамлакатда қолиш ҳуқуқини қонунийлаштириш ёки Россияни тарк этиш мажбурияти юклатилган.
