Avstraliya va Yangi Zelandiya Rossiyaning Ukrainaga keng miqyosli bosqinining uchinchi yilligi munosabati bilan Rossiya fuqarolari va yuridik shaxslariga qarshi yangi sanksiyalar eʼlon qildi.
Avstraliya 70 nafar rossiyalik shaxsga nisbatan sanksiyalar va Rossiyaning 79 ta kompaniyasiga nisbatan moliyaviy sanksiyalar joriy etganini maʼlum qildi.
Avstraliya tashqi ishlar vaziri Penni Vongning so‘zlariga ko‘ra, bu sanksiyalar, xususan, Rossiya tomonidan bosib olingan Ukraina hududlaridagi hokimiyat xodimlariga, harbiy-sanoat, transport va moliya sohasidagi kompaniyalarga, shuningdek, Rossiya va Shimoliy Koreya o‘rtasidagi harbiy hamkorlikda ishtirok etgan shaxs va firmalarga nisbatan qo‘llanilgan.
Yangi Zelandiya tashqi ishlar vaziri Uinston Piters 52 nafar rossiyalik shaxs va kompaniyaga nisbatan sanksiyalar joriy qilinganini eʼlon qildi.