Davlat bojxona qo‘mitasi matbuot xizmatining xabar berishicha, tezkor tadbir davomida avvaldan kuzatuvga olingan shaxs boshqaruvidagi “KAMAZ” yuk avtotransport vositasi “Sirdaryo” chegara bojxona postida to‘xtatilib, belgilangan tartibda ko‘zdan kechirilganida, salondagi sport sumkasiga 8 bosh lochin yashirilgani fosh bo‘ldi. Boz ustiga, qushlarga shafqatsizlarcha munosabatda bo‘lingan. Jonzotlar sumkaga ularning hayoti uchun xavfli tarzda zichlab joylashtirilgan.
Maʼlum qilinishicha, shu kuni tezkor tadbir Sirdaryo tumanida ham davom ettirilib, ushbu qushlarni sotib olayotgan shaxs ham qo‘lga olingan. Mazkur holatda ushlab qolingan 8 bosh lochin O‘zbekistonning 2019-yilda chop etilgan Qizil kitobiga kiritilgan va tabiatan kamyob hisoblanadi hamda ularni ovlash taqiqlangan. Lochinlarning 6 tasi Qizil kitobga Itolg‘i nomi bilan kiritilgan bo‘lib, ular tobora yo‘qolib borayotgan tur hisoblanadi.
Surishtiruvlar davomida qonunbuzarlar ushbu qushlarni 280 million so‘mga pullamoqchi bo‘lgan.
Hozirda lochinlar Toshkent hayvonot bog‘iga vaqtincha saqlovga topshirildi va mutaxassislarning doimiy nazoratida parvarishlanmoqda.
Holat yuzasidan esa bojxona organlari tomonidan surishtiruv harakatlari olib borilmoqda.
Avvalroq O‘zbekiston Qizil kitobiga kiritilgan kamyob do‘lta (sirtlon)lardan biri o‘ldirilgani, Buxoro shahrida Qizil kitobga kiritilgan qush savdosining oldi olingani va tabiatga qo‘yib yuborilgani hamda Hisor qo‘riqxonasida noyob tog‘ echkisini ovlaganlar qo‘lga olingani haqida xabar berilgandi.