“Толибон” НАТОни дипломатик тамойиллар асосида мулоқот қилишга чақирди
НАТО Афғонистондаги мағлубиятидан кейин “Толибон” билан дипломатик тамойиллар билан мулоқот қилиши керак. Бу ҳақда ҳаракат расмий вакили Забиҳулло Мужоҳид маълум қилди.
“НАТО бош котиби маълум бир вақт оғриқ хис қилиши ва мағлубият ҳақида гапириши мумкин. Аммо альянс аъзолари толибларга қарши ҳужум даври ўтганини тушуниши керак. Ўтган 20 йил бу ҳаракатлар самара бермаслигини ва дипломатик тамойилларга амал қилиш кераклигини кўрсатди”, – деган Мужоҳид.
Унинг қўшимча қилишича, ҳозирда ҳар икки томон учун ҳам терроризмга қарши кураш муҳим масала. “Терроризм таҳдидига қарши ютуқларни сақлаб қолиш муҳим. Афғонистон ҳукумати ҳам, НАТО ҳам мамлакатда халқаро террорчилик гуруҳлари қайта тузилишини диққат билан кузатади”, – деб айтиб ўтган “Толибон” расмий вакили.
Маълумот ўрнида: 15 август куни “Толибон” Кобул шаҳрини жангсиз эгаллади. Шундан кейин Афғонистондаги марказий ҳокимият ҳаракат қўлига ўтди. Ҳозирда уларнинг ҳокимияти ҳеч қайси давлат томонидан тан олинмаган бўлса-да, турли даражада мулоқот йўлга қўйилган.
Бундан аввал Забиҳулло Мужоҳид “Толибон” даромади ҳақида маълумот берганди. Шунингдек, АҚШ ва толиблар музокаралари ҳақида хабар берилганди.
Жахонгир Қўзиев
